Declaráu Reserva de la Biosfera en 2003, abarca territoriu de los conceyos de Cangas del Narcea, Degaña ya Ibias. Las súas más de 47.500 ha confiéren-y ser el de mayor extensión d'Asturias. El sou territoriu engloba a la súa vez las reservas naturales de Muniel.los ya El Cuetu d'Arbas, l.levando los sous límites al Parque Natural de Somiedu. El parque inclúi'l nacimientu del ríu Narcea, el ríu Muniel.los ya la cabecera alta del ríu Ibias, qu'anque naz en tierras degañesas recói gran parte del territoriu ibiense siendo tributariu del Navia.

El poblamientu rin ya'l relieve malu conservan nun bon estáu grandes masas forestales autóctonas. Pero son, nun hai duda, los fayeos del Monte d'Ermu (conca alta del Narcea) ya los carbayeos de Muniel.los, los que destacan tanto pol sou grau d'extensión cumo pol sou estáu de conservación excelente. Na súa extensión vasta existe un espectru de vexetación ampliu que ta presente ente los 600 m d'El Pueblu Rengos ya los 2.007 m d'El Cuetu d'Arbas, ande las bedures, los rebol.los, los piornos ya'l queirín repártense ente las montañas.

L'augua tien un protagonismu especial no Parque Natural. A la súa rede hidrográfica extensa xúntanse l.lagunas ya muel.les cumo las d'Arbas, L.laul.lina, Fontes del Narcea, Reconcu ou L.langreiros, qu'acóin una vida animal y a vexetal rica que, pol sou tamañu, pasa muitas veces desapercibida. La naturaleza ufierta tesouros ocultos, rarezas cumo'l nenúfar que s'atopa nas muel.les de Reconcu, l'únicu sitiu de la península ande miedra'l ranúnculu de Muniel.los, especie endémica que naz nos l.leirones.

El respetu pola naturaleza ya lo qu'el.la-ys proporciona conseguíu que l'adaptación de las súas xentes al mediu asocediese de forma armoniosa. Molinos qu'aprovechan el cursu de los ríos, brañas nas zonas altas ande'l ganáu pasa'l branu ou los cortinos que s'esparcen polas faldas de las montañas pa cudiar el miel del osu, son dalgunos de los usos tradicionales que los habitantes de la comarca consiguienon integrar no paisaxe sin dañalu.

L'ámbitu del parque constitúi unu de los sitios de mayor riqueza faunística de todu El Cordal, cumo testimonia la presencia del osu pardu en cotas altas yá'l reflexu del sou bon estáu ya'l sou éxitu reproductor. Destacan tamién outros mamíferos cumo'l l.lobu, el xabaril, el corzu ou'l rebecu. Destacan tamién na zona, anque con un tamañu menor, la raposa, la garduña, la xineta ya l'auguanón. Ente los páxaros destacan pol sou nivel de supervivencia, el feisán cantábricu con media docena de machos ya, en menor nivel, el picu medianu, que ta al borde la extinción.