Constitúi un exemplu bien característicu ya guapu de monte caducifoliu ya yá'l recursu natural más importante de la comarca. Declaráu Reserva de la Biosfera'l 9 de noviembre de 2000, cunta con una superficie de 5.488 ha. ya compriende los montes de Muniel.los ya La Viliel.la, en Cangas del Narcea, ya'l monte de Valdebois, n'Ibias. Pola súa extensión ya grau de conservación constitúi'l mayor carbayéu d'España ya unu de los meyor conservaos de toda Europa.

El monte de carbayu yá predominante sobre outras especies tamién presentes, cumo fayas, ablanos, freisnos, salgueiros ou prádanos. Son montes que destacan por un grau de naturalidá grande ya pola presencia humana rina. Muniel.los recói amás unas 400 especies de flora vascular, incluidas no Catálogu d'Especies Amenazadas del Principáu d'Asturias. Posee tamién una gran variedá d'hongos, mofos ya sobre todo líquenes, qu'en dalgunos casos namás s'atopan nesti monte ya que son el mayor indicador de calidá ambiental. Ente la flora protexida tienen una relevancia especial el xardón ya'l teixu, presentes na mayor parte de los montes, pero especialmente numarosos en Muniel.los.

Muniel.los alberga seis l.lagunas d'orixe glaciar: L'Aveizuna, La Penavelosa, ya las cuatro que componen el grupu conocíu cumo Las L.lagunas (La Grande, La Isla, La Fonda ya La Pena).

Ente la súa fauna destaca l'osu pardu cantábricu ya'l feisán, especies protexidas dende hai tiempu, anque son más comunes los l.lobos, corzos, xabariles, rebecos ya l.lóndrigas.

Las visitas al monte tán restrinxidas a 20 personas por día, a fin de preservar l'ecosistema. P'acceder al mesmu yá necesario solicitar antias por escrito.

VISITAR MUNIEL.LOS