La reserva asítiase al oeste d'El Puertu (Brañas/Leitariegos) ya yá'l límite oriental del Parque Fontes del Narcea. Ocupa 29 km2, al norte hasta la confluencia del ríu Naviegu cono ríu Molín, al sur cona provincia de L.lión ya al este cono Parque Natural de Somiedu. Constitúi unu de los meyores exemplos de modelu glaciar d'arias montañosas occidentales asturianas. Val.les amplios ya formas d'erosión cumo circos, nichos ou aristas glaciares favorecen el desenvolvimientu de turberas cumo la de L.laul.linas ou Reconcu, asitiándose aiquí unu de los meyores conxuntos d'Asturias.

El Cuetu d’Arbas da nome a la reserva ya yá amás el picu más altu de la comarca con 2.007 metros. No sou entornu los fayeos ya los carbayeos tán bien representaos nas súas faldas, deixando ver la riqueza ya'l bon estáu de conservación de la vexetación forestal de los val.les. Éstos ya la vexetación subalpina son los tesouros verdadeiros qu'agospia esta reserva ya los que fan d'el.la un espaciu únicu. L'osu pardu yá, nun hai duda, l'animal más representativu. Nesti l.lugar atopan ande guardase ya pasu ente Degaña ya Muniel.los hacia Somiedu, constituyendo un cordor biolóxicu primordial pa la súa supervivencia. Vive dientro del aria de la reserva ande s'alcontra con unas condiciones d'hábitat ya desenvolvimientu magníficas. Outras especies relevantes son la l.lóndriga, el corzu, el xabaril ya'l l.lobu, con arias estables de cría ya presencia de grupos familiares.

L'accesu más fácil faise dende la carretera comarcal AS-213, que l.lieva de Cangas del Narcea a Vil.lablinu por El Puertu (Brañas/Leitariegos) ya constitúi'l cabu más oriental de la reserva.