L’Aria de Deportes del Conceyu de Cangas del Narcea organiza por quintu añu consecutivu’l Tornéu Solidariu de Navidá de Baloncestu, que nesta edición vei celebrase los sábados 22 ya 29 del mes muertu.

L’obxectivu d’esti tornéu yá la recoyida d’alimentos non perecedeiros, qu’al traviés de los Servicios Sociales del Conceyu van repartise ente las vecinas ya vecinos de Cangas que más lo necesiten.

Cumo novedá, estiañu vei faese un tornéu “tres x tres” el sábadu 22, nél van poder participar menores de 16 años ya mayores de 16 años con equipos mestos. Nos dous casos los ganadores van recibir cumo premiu una cena nun establecimientu de la vil.la ya un lote de regalos. Amás, al tratase d’un tornéu solidariu, el dineiru recaudáu al traviés de las inscripciones de los equipos vei destinase íntegramente a la compra d’alimentos.

El sábadu 29 del mes muertu van venir a Cangas equipos de baloncestu de Galicia, Cantabria, L.lión ya outras zonas d’Asturias pa disputar el tornéu por equipos. El platu fuerte vei ser l’enfrentamientu ente C.B. Estudiantes de Lugo, perteneciente a la Liga Española de Baloncestu Amateur (E.B.A.), contra Unión Financiera Asturiana O.C.B., de la Liga Española de Baloncestu Plata (L.E.B. Plata), que vei faese a las 18:00. Amás, durante los descansos del tornéu vei faese una exhibición de las categorías inferiores de C.B. Narcea ya de los equipos de la Sociedá Deportiva Narcea.

La entrada al tornéu, que vei disputase no Polideportivu d’El Regueirón ya nas canchas anexas, vei ser dafeitu de baldre. Anque dende la organización pídese a las personas qu’asistan cumo públicu que l.lieven dalgún alimentu non perecedeiru, que vei ser recoyíu pol voluntariáu de Cruz Roja ya entregáu a los Servicios Sociales del Conceyu pa ser repartíu ente la población de la zona que más lo necesite.
 

Imágenes