La prueba, incluida dientro de la Copa d’Asturias, vei xuntar a 250 corredores el domingu 28 d’abril.

L’Asociación Deportiva de Mual xunto cona súa asociación cultural ya de muyeres volvíu xuntar las súas fuerzas pa organizar la segunda carrera de montaña “Puerta de Muniel.los”. La cita vei ser el domingu 28 d’abril ya la organización cunta con 250 corredores que van chegar de toda España a Mual pa esfrutar de 21 quilómetros de carrera nun entornu natural únicu.

Estiañu la carrera foi aceptada pola Federación de Deportes de Montaña, Escalada ya Senderismu d’Asturias (FEMPA) cumo prueba dientro de la Copa d’Asturias, lo qu’obligóu a la organización a endurecer dous tramos del recorríu consiguiendo un desnivel de 2.900 metros acumulaos.

La carrera vei empicipiar a las 09:30 na plaza de Mual ya recorrer los puntos siguientes: La Pumariega, Bustiel.lu, Moruecos, Tachurrosu, Tabláu, Reiduz, Montecín, La Carril del Mediu, Fonte la Duerna, Braña de Moncóu, Chanu la Col.lada, Pena Moncóu, Cruces, Paramiu. A las 14:15 vei faese la entrega de premios tanto a los ganadores absolutos de la carrera cumo a los primeiros tres clasificaos de cadaguna de las categorías participantes: sub 23, senior, veteranu A ya B femenina ya masculina.

Esti eventu deportivu ciérrase con una xanta d’harmanamientu ente participantes, organizadores ya públicu en xeneral na plaza de Mual.

Imágenes