El sou retu próximu yá consiguir formar parte de la Selección Asturiana p’asistir al Campeonatu d’España, que vei celebrase en Madrí los días 20 ya 21 d’abril.

Los karatecas cangueses del Gimnasio Coliseum participanon el sábadu seis d’abril no Campeonatu d’Asturias de Kárate vilaxu, infantil ya xuvenil de la modalidá kata ya kumite, qu’organiza la Federación Asturiana de Kárate, consiguiendo subise al pódium en seis ocasiones.

Na categoría xuvenil de kata femenín el pódium foi dafeitu cangués, siendo Claudia Pasarín la campeona d’Asturias; Clara Puerto la subcampeona ya Alba Calzón la tercera. Amás, Laura Gómez proclamóuse subcampeona de kumite xuvenil ya Alberto Gómez ya Samuel Sánchez consiguienon el tercer puestu del pódium na categoría de kata vilaxu ya xuvenil, respectivamente.

Esti eventu deportivu celebróuse no Polideportivu de Florida Arena, que xuntóu a unos 176 karatecas de 18 ximnasios, ente el.los medallistas del añu pasáu no Campeonatu d’España.
Francisco Martins, director ya profesor de kárate del Gimnasio Coliseum, mostróuse arguyosu del trabayu feitu por tódolos sous pupilos no campeonatu “tanto de los medallistas cumo de los que nesta ocasión nun consiguienon subise al caxón de los éxitos”.

Amás, Martins adelantóu que’l sou alumnáu enfrentase agora a un “camín difícil” pa poder formar parte de la Selección Asturiana ya, polo tanto, poder participar no Campeonatu d’España que vei celebrase en Leganés, Madrí, los días 20 ya 21 d’abril, ya nel que Martins vei ser l’árbitru. Nesti sentíu, Martins tamién anuncióu que vei formar parte cumo maestru del Primer Campus de Kárate n’Amposta (Tarragona), organizáu pola Federación Española de Kárate ente’l 30 de xunu ya’l seis de santamarina.

Imágenes