El ximnasiu Coliseum de Cangas del Narcea foi hasta’l l.lugar de Piedrasblancas pa participar no Campeonatu de Promoción Kumite, que se celebróu’l 19 de xineiru.

Cumo vien siendo normal los karatecas cangueses deixanon la súa impronta no campeonatu al consiguir subise al pódium en tres ocasiones. Claudia Pasarín coronóuse cumo campeona de la categoría xuvenil, xunto cona súa compañera Laura Gómez, qu’ocupóu’l tercer puestu. Na categoría xuvenil masculina, Pedro Martínez consiguíu la medalla de bronce.

Mientras una parte del ximnasiu Coliseum participaba no Campeonatu de Promoción de Kumite en Piedrasblancas, el sou director Francisco Martins acudía cona Selección Asturiana de Kárate, en calidá de seleccionador, al XVI Troféu Interautonómicu de Collado de Alba.

La Selección Asturiana conquistóu en Madrí’l tercer puestu del pódium, lo que pa Francisco Martins supón “un pasu p’alantre no camín que l.levan los resultaos”.

Imágenes