Un itinerariu interesante permítenos visitar el patrimoniu de la vil.la. Construcciones tradicionales, cal.les cuestas ya estrechas, palacios, casonas, ilesias, capiel.las ya pontes completan el recorríu. L'itinerariu ordenáu que se propón, vei ayudanos a faer un paséu pa visitar los monumentos principales de Cangas del Narcea.

PALACIU D'OUMAÑA:

Foi construíu a mediaos del sieglu XVI, n'estilu renacentista. Presenta na fachada dúas torres que flanquean un cuerpu central, destacando la ventana d'estilu platerescu. Portada d'arcu de mediu puntu enmarcada con alfiz. Estructúrase alredor d'un patiu central columnáu. Foi reformáu ya agora yá la sede de la Casa la Cultura de Cangas del Narcea.

BASÍLICA SANTA MARÍA MADALENA:

Monumentu Histórico-Artísticu Nacional dende 1982 ya basílica dende 1992. Yá unu de los meyores exemplos de l'arquitectura barroca n'Asturias. Edificada por mandatu del ilustre cangués D. Fernando Valdés ya Chanu, arzobispu de Granada ya miembru del Conseyu de Castía, siguiendo los planos de Bartolomé Fernández Lechuga (maestru mayor de l'alhambra). Tien un conxuntu de retablos barrocos cualificáu (sieglos XVII- XVIII), destacando'l mayor, obra de Pedro Sánchez Agrela. Guarda sepulcros n'alabastru del fundador ya del sou sobrín.

PONTE COLGANTE:

Pasu peonil construíu en 1970. Obra del arquitectu del conceyu José Gómez del Collado sigún modelu d'arquitectura orgánica ande las pilastras inclinadas asumean dous homes que mediante la súa fuerza atirantan los cables de suxeción.

PALACIU DE PAMBLÉI:

Asitiáu na cal.le La Fonte, construíu no sieglu XVI, siendo'l más vieyu de la vil.la. Conserva patiu central con columnas toscanas.

PALACIO DE LOS CHANU:

Construcción de finales del sieglu XVIII de proporciones guapas propias del barrocu últimu. Destacan balcones en forma de púlpitu.

LA FONTE:

Construcción popular del sieglu XVII que da nome a la cal.le.

PONTE MEDIEVAL:

Popularmente conocida cumo ponte romana, asítiase na confluencia de los ríos Narcea ya Naviegu, no barriu tradicional d'Entrambasauguas. Tien trazáu ya tipoloxía de los sieglos XIII-XIV.

PALACIU DE LOS URÍA:

Construíu no 1712, consta d'una torre n'esquina ya dous cuerpos adosaos.

ERMITA DEL CARME:

Tol caseríu del barriu d'Entrambasauguas organízase en tornu a esti templu. Construíuse na primer mitá del sieglu XVIII, siendo costeada polos devotos de la Virxe del Carme. Destaca polas súas proporciones elevadas, con espadaña-campanariu esbelta.

CASA DE CHANU-FLÓREZ:

Repite'l mesmu esquema de construcción del Palaciu de los Uría, no mesmu barriu.

ESTATUA DEL TIRADOR:

Creóuse no añu 2002 con motivu del centenariu de la fundación de la Sociedá d'Artesanos de Nuesa Sra. del Carme, responsables de la organización de La Descarga.

PALACIU CONDES TORENO:

Monumentu Histórico-Artísticu, unu de los más bellos exemplos de l'arquitectura civil asturiana ya sede de la Casa Conceyu. Construíu no añu 1701, sigún reza nuna inscripción grabada nuna de las columnas del patiu, pol arquitectu avilesinu Juan García de la Barrera. D'estilu barrocu, ta formáu por un cordor apoyáu en columnas octogonales alredor d'un patiu central. Fachada con dúas torres blasonadas ya cuerpu central adornáu con balconada.

MONUMENTU AL MINEIRU:

Inauguráu en 1984 n'homenaxe al mundu de la minería, de gran importancia na zona. Representa la figura d'un picador ya'l sou ayudante ou ¿guah.e¿.

CHALÉ DEL SOLISO:

Construcción indiana l.levantada no cuartu segundu del sieglu XX. Presenta doble escalinata monumental d'accesu ya espaciu axardináu.

PALACIU DE PEÑALBA:

Monumentu Histórico-Artísticu edificáu no sieglu XVIII, n'estilu barrocu. Presenta dúas torres que flanquean un cuerpu central, rematáu con un frontón triangular que recói l'escudu. Yá'l primer modelu de palaciu urbanu concebíu pa una cal.le, ande'l patiu yá substituíu pola escalera cumo elementu distribuidor.

CAPIYA DEL SANTU CRISTO DEL HESPITAL:

Restu únicu del hespital antiguu de pelegrinos reconstruíu por Ares d'Oumaña no añu 1555. Escudu de la familia na fachada xunto a una figura de San Xuan Evanxelista.

TEATRU TORENO:

Nacíu cona idea de ser centru de cultura pa los cangueses, pudiéndose faer gracias a la cesión del solar por parte de los Condes de Toreno. Inauguróuse en 1927, presentando un diseñu d'estilu historicista.

PALACIU DE XUSTICIA:

Obra de finales del sieglu XIX d'estética historicista. Nas proximidades asítiase'l bustu de José Francisco Uría ya Riego, cangués ilustre nacíu en 1819, gran impulsor de las infraestructuras asturianas de la época.