El xuráu del XVII Concursu de cuentos curtios del Conceyu Cangas, formáu por  Laura Marcos, filóloga ya escritora; Elías Veiga, escritor; ya Mónica Rodríguez, responsable del Serviciu de Normalización L.lingüística del Conceyu Cangas,  decidíu na regunión celebrada'l vienres, 20 del mes muertu, conceder el primer premiu de la categoría d'asturianu normativu a José Ángel García Fernández, ¿José Ángel Gayol¿, pol sou cuentu El llobu ya deixar desierta la categoría d'occidental.

El ganador cunta con una traxectoria literaria impecable que conxuga la creación ya la crítica tanto n'asturianu cumo en castellanu.

Colaboróu ya colabora con revistas cumo Atlántica XXII, Clarín, Reloj de Arena, Paralelo Sur, Formientu, esTandoriu ou La Nueva España, ente outros.

Editóu el valume colectivu Nuevas maneras de contar un cuento ya col l.libru Con el velo de una sonrisa ganóu'l Premiu Asturies Xoven de Poesía.
Outramiente, n'asturianu, tien publicada una novela, Argonautes; una obra de teatru ganadora del Premiu Asturies Xoven de Testos Teatrales: Ensin noticies del fin del mundu; varios poemarios, ente el.los, destacan El llibru de les coses misterioses, XVIII Premiu Xuan María Acebal;  Los suaños y los díes, XVIII Premiu Fernán Coronas ya dalgunos ensayos, cumo Vértigu, XXI Premiu Fuertes Acevedo ou El silenciu invisible, ganador, precisamente, del premiu Fuertes Acevedo d'Ensayu na convocatoria d'esti 2019.
    
El cuentu ganador del XVII Concursu de cuentos curtios del Conceyu Cangas, El llobu, cunta con corrección literaria ya lingüística ya con una trama bien trabayada, onde abondan las descripciones históricas, principalmente d'ambientación bélica. Igualmente, el xuráu destacóu la proxección psicolóxica del ambiente na construcción ya devenir del personaxe ya la técnica narrativa depurada, capaz de recrear ya alternar ambientes ya personaxes de manera paralela nuna mesma trama ya'l final abiertu a la colaboración cómpliz de las lectoras ya lectores