Nico González, Claudia Pasarín, Alejandro Cachón ya Alba Calzón, karatecas del ximnasiu Coliseum, desplazánonse, xunto cono sou profesor, Francisco Martins, a la ciudá de Paredes n’O Porto (Portugal) pa participar no I Torneio e Estagio de Karate das Vendimias, que se celebróu no fin de sumana del 13, 14 d’outubre.

Dous de los representantes cangueses consiguienon subise al pódium, quedando a las puertas de consiguilo, nun puestu cuartu, Claudia Pasarín ya Alba Calzón. Nico González ya Alejandro Cachón demostranon el sou arte enfrentándose a karatecas que los superaban n’edá.

Nico, con 16 años, participóu na categoría sub 21, destinada a mayores de 18 años. Na segunda vuelta de clasificación touvo qu’enfrentase a un rival fuerte, Andre Vieira, terceiru d’Europa Universitariu, énte’l que perdíu por un resultáu axustáu de 3 a 2. Con todo ya con el.lo, consiguíu l.levar pa casa la medalla de bronce.

El sou compañeiru, Alejandro Cachón, destacóu na categoría cadete consiguiendo’l puestu segundu del pódium. No sou casu, tamién xugaba con desventaxa d’edá, yá qu’enfrentábase a karatecas de 15 años, conos sous 13 recién cumplíos.

Francisco Martins subrayóu’l gran esfuerzu ya trabayu de los sous pupilos nesti tornéu ya recordóu-ys: “nun yá bono namás ganar, perdiendo tamién se deprende ya yá un traxectu que tenemos qu’andar pa poder trunfar”.

Imágenes