L’Aria de Deportes del Conceyu de Cangas del Narcea tien todo preparao pa dar el pistoletazu de salida al sou Tornéu solidariu de Navidá de baloncestu, que cumple la súa edición quinta.

Estiañu’l tornéu divídese en dúas partes pa incluir la novedá d’un enfrentamientu “tres por tres” que se celebra’l sábadu 22 del mes muertu ya nel que participan un centenar de xugadoras ya xugadores dividíos nas categorías senior ya menores de 16 años.

El tornéu vei arrancar a las 10:00 no Polideportivu del Conceyu, conos participantes menores de 16 años. Nesa mañena van disputase hasta 10 partíos de los que vei salir un únicu equipu ganador.

L’horariu de tarde ta reserváu pa la categoría senior, que vei xugar 12 partíos que van empicipiar a las 15:30.

Nos dous casos los equipos ganadores van recibir cumo premiu una cena nun establecimientu de la vil.la ya un lote de regalos. Amás, al tratase d’un tornéu solidariu, los cuartos recaudaos al traviés de las inscripciones de los equipos van destinase íntegramente a la compra d’alimentos.

Na segunda parte del tornéu, que vei celebrase’l sábadu 29 del mes muertu, Cangas del Narcea vei recibir equipos de baloncestu de Galicia, Cantabria, L.lión ya Asturias, pa disputar el tornéu por equipos. Amás, el Polideportivu del Conceyu vei ser l’escenariu del enfrentamientu ente C.B. Estudiantes de Lugo, perteneciente a la Liga Española de Baloncestu Amateur (E.B.A.), contra Unión Financiera Asturiana O.C.B., de la Liga Española de Baloncestu Plata (L.E.B. Plata), que vei faese a las 18:00.

Tamién, durante’l sábadu 29 de los santos na entrada del Polideportivu del Conceyu, vei efectuase la recoyida d’alimentos non perecedeiros por parte del voluntariáu de Cruz Roja, alimentos que van ser entregaos a los Servicios Sociales del Conceyu de Cangas del Narcea pa ser repartíos ente la población del conceyu que más lo necesite.