Cangas del Narcea cunta con una muestra artística variada ya representativa, tanto del arte eclesiásticu cumo de l’arquitectura civil. Sitiu prolíficu nas fundaciones monacales na alta Edá Media, na actualidá tovía se conservan en muitas iglesias restos de monesterios antiguos ya que, con tener experimentao dalgunas modificaciones, conservan el sou valir patrimonial.

Hai que destacar ente todas estas el Monesteriu de S. Xuan Bautista de Courias, de fundación benedictina no s. XI, ya que ta asitiáu a 2 km de la vil.la de Cangas del Narcea, siendo’l conxuntu arquitectónicu d’influencia herreriana’l más impresionante de todu l’occidente asturianu ya unu de los más importantes de la zona. Fundáu pol Conde D. Piñolo ya la súa muyer Aldonza, tovía conserva dalgunos restos escultóricos de la primer construcción. La iglesia, d’estilu neoclásicu, foi edificada a principios del s. XVI ya agospia retablos de los sieglos XVII ya XVIII. La súa planta ocupa 8.000 m ya cunta con dous claustros. Todu’l conxuntu yá impresionante, igual que la estatua enorme de S. Xuan Bautista, del s. XVII. En 1763, un incendiu destrúilu parcialmente ya constrúise’l monesteriu actual, qu’acabóu de construise en 1808. Del interior hai que destacar el retablu magníficu d’estilu barrocu que data de 1680, amás del Cristo románicu del s. XII, conocíu cumo’l Cristo de la Cantonada, el meyor exemplu del barrocu d’Asturias. Outru de los sous atractivos constitúilu’l sou claustru monumental con arquería de mediu puntu, sobre él sitúase la balconada de los pisos superiores.

La Basílica de Sta. María Magdalena, declarada monumentu histórico-artísticu, yá un exemplu magníficu de l’arquitectura clasicista barroca. Tien un conxuntu de retablos barrocos cualificaos (s. XVII-XVIII) d’ente los que destaca’l mayor (1643). La basílica presenta al exterior una fachada sombría ya hermosa, amás d’un bon xuegu de valúmenes domináu pol cruceiru monumental. Los planos débense a Bartolomé Fernández Lechuga, maestru mayor de l’Alhambra.

La Capilla del Carmen (Entrambasauguas), asitiada no barriu del mesmu nome, yá una construcción barroca del s. XVIII, na que s’agospia la imaxe de la patrona de la vil.la, que sobresal pola súa silueta singular ya por tar enclavada nunu de los requeixos más antiguos ya guapos de la vil.la canguesa.

El Santuariu de Nuesa Señora de L’Acebu (S. XVI), asitiáu nun sitiu predominante cercanu a la vil.la ya con vistas a los val.les del Narcea ya a la zona de Sierra, sigue siendo na zona un centru de pelegrinación mariana concurríu ya al que se-y atribúi una lista l.larga de feitos prodixosos. Aiquí existe un aria recreativa pa esfrutar d’una xornada campestre rodeaos d’un paisaxe bellísimu. A 3 km del santuariu, en L.linares, asitiase la Ilesia de Santa Mª Madalena, que presenta no sou interior una talla del s. XIII.

No conceyu, existen amás muitas muestras d’arte románicu ya góticu nas ilesias pequenas de los pueblos, ente el.las destacan la Ilesia de San Pedru Culiema, d’estilu románicu ya con tallas medievales bien guapas; la Ilesia de San Mamés en Tubongu, románica con modificaciones sucesivas; la Ilesia de Carceda conas súas pinturas murales, retablos góticos ya imáxenes románicas; la Ilesia parroquial de Santa María de L.lumés, d’estilu románicu cangués, ya nun l.lugar cercanu, L’Ardalí, el palaciu de los Queipo Chanu; la Ilesia de Santa María de Xedré, d’estructura románica na que se conservan varias tallas medievales: un calvariu ya dúas figuras d’apóstoles, destacando tamién nesti nucleu la casona blasonada de López del Campillo; la Ilesia de Santa María de Carbachu, de nave única ya capilla semicircular con ventana gótica, esti nucleu cunta tamién con un palaciu interesante d’orixe medieval, reconstruíu no s. XVI.

La existencia de muita nobleza de carácter rural ya que consiguíu gran relevancia ya poder más al.lá de los términos del conceyu durante la Edá Moderna potencióu que no conceyu proliferaran muitos palacios de los sieglos XVI ya XVII, que cheganon hasta güei. No nucleu de la vil.la destacan ente outros: el Palaciu d’Oumaña (s. XVI), asitiáu xunto a la basílica, d’estilu renacentista con influencias góticas, mui reformáu, pero conservando dalgunos elementos orixinales, cumo la puerta principal n’arcu de mediu puntu ya dúas ventanas. El Palaciu de Peñalba (s. XVIII), declaráu monumentu histórico- artísticu, asitiáu na C/Mayor, nél puede contemplase un gran escudu que corona’l cuerpu central de la fachada. El Palaciu de los Condes de Toreno (1701), Monumentu Histórico-Artísticu, sede de la Casa Conceyu ya tamién de la Casa la Cultura, yá un edificiu notable d’estilu barrocu nel qu’a los dous l.laos de la fachada elévanse simétricas, dúas torres blasonadas nas que parecen los escudos familiares. El patiu interior ta rodeáu de columnas octogonales que soportan un corredor de madera ampliu.

No restu del conceyu, merecen la pena visitase: el Palaciu de los Sierra en L.lamas del Mouru, que presenta tres torres, dúas cuadradas flanqueando la fachada ya outra no lateral izquierdu de la parte trasera que s’adosa a la capilla. Nel Palaciu de los Queipo de Chanu en San Pedru d’Arbas, (s. XVIII), destaca’l gran escudu de familia.

No pueblu de Bisuyu, pola súa parte, eríxese la conocida cumo La Casona (s. XIX), casa na que nacíu Alejandro Casona ya la ilesia de Samartín ya no pueblu de Xinestosu, centru de producción queisera, consérvase la Ilesia de San Pedru, complementándose asina la ufierta de núcleos que mere la pena visitar por todo lo que conservan del sou carácter tradicional.