Estas en:

Teatru Toreno

Asitiáu no corazón de la vil.la’i Cangas del Narcea, el teatru Toreno yá un edificiu de 655,70 m2 de superficie construida nel que destaca claramente la súa fachada principal, dividida en dúas partes ya coronada por un frontón con escudu.

A petición de la mocedá canguesa, el teatru foi cedíu en 1923 pol conde Toreno a los habitantes de la vil.la, pa qu’ail.lí pudieran representar las súas funciones a cambiu de destinar los recursos qu’estas xeneraran al adecentamientu del edificiu. La cesión del edificiu efectuóuse baxo la condición de que’l sou destín fora’l de teatru. Pa la súa reedificación créase una xunta xestora, que se constitúi cumo sociedá na que los habitantes de Cangas del Narcea podían participar mediante la compra de participaciones de 52 ptas.

Reconstruíu pol arquitectu Leopoldo Corujedo siguiendo las tendencias historicistas de la dómina, el teatru foi inauguráu en febreiru de 1927. Más tarde, en 1957, empicipia a funcionar cumo sociedá anónima, siguiendo cumo cine hasta qu’en 1983 abandónase definitivamente.

El 26 de febreiru de 1993 l’edificiu pasa a ser propiedá del conceyu, espuéis d’un procesu l.largu d’expropiación ya cono fin de constituise nun marcu adecuáu pa la práctica d’actividades culturales, d’esparcimientu ya d’outros actos de carácter públicu.

Con todo, ya énte l’estáu d’abandonu nel que se topa nesti momentu, preséntase la necesidá de proceder a una rehabilitación que vei ser acometida pola “Escuela taller teatru Toreno de Cangas del Narcea” cona colaboración del Ilmu. Conceyu. L’obxectivu fundamental d’esta actuación foi recuperar esti teatru cumo bien d’interés cultural ya históricu pa la comunidá de Cangas del Narcea ya volve-y la función cultural importante que nun principiu tenía, al tiempu que se dotaba a la zona d’una infraestructura básica pal desenvolvimientu de todu tipu d’iniciativas culturales.

En consecuencia, la rehabilitación efectuóuse cona orientación d’executar las actuaciones precisas pa consiguir un teatru modernu, adaptáu a la normativa vixente, ya nel que fose posible un usu polivalente cumo teatru, sala de conferencias, proxecciones, exposiciones ya demás actos culturales que pudieran faese na vil.la.

El resultáu foi un teatru con una superficie total construida superior a los 650 m2, de los que 387,20 son útiles ya tán repartíos en 4 pisos (semisótanu ya tres pisos), con capacidá pa 196 plazas, la mayor parte no pisu baxu ya’l restu nel anfiteatru ya palcos asitiaos no primer pisu.

Amás, cunta con una zona específica pa los actores (aseos ya guardarropa), un escenariu de 36,16 m2 ya un local de zona de tramoyas. Dau’l carácter multifuncional del que se quixo dotar, incluíuse na construcción una oficina de xestión, así cumo una sala polivalente con capacidá pa 30 personas.

En todu’l procesu de remocique del edificiu siguíuse la idea de protexer na midida de lo posible tódolos elementos orixinales cono fin de conservar el sou estilu históricu. Nos casos nos que nun foi posible pol sou estáu ruinosu, procedíuse a la introducción d’elementos nuevos teniendo en cuenta’l marcu xeneral nel que s’inscriben, de modu que, dende’l puntu de vista estéticu, consiguiráse una integración armoniosa na estructura orixinal del edificiu.

El teatru vuelve a abrise al públicu en diciembre de 1998 con una sumana d’actividades ya con actu d’inauguración oficial el vienres 18 de diciembre con un conciertu del tenor Joaquín Pixán.

Enguano, l’actividá del teatru yá continua ya ta incluida en varios programas culturales, cumo’l Circuitu Asturianu de Teatru, la Federación de Teatru Amateur, amás de los ciclos de teatru de Cajastur, siendo referente cultural de la vil.la xunto cona Casa la Cultura.