¿QUIÉN SOMOS?

La entidá Bombeiros d’Asturias, creada no 2001 espuéis de la disolución del CEISPA (Consorciu d’Extinción d’Incendios, Salvamentu ya Protección Civil del Principáu d’Asturias) adscríbese a la Dirección de Seguridá Pública ya trabaya dende entós pa implantar un serviciu rápidu, eficaz ya que cubra las necesidades de la ciudadanía asturiana.

En Cangas del Narcea Bombeiros d’Asturias cunta con un parque 24 horas asitiáu no pueblu de Tubongu. Esi parque dispón de 10 vehículos ya nél desempeñan el sou l.labor un total de 29 efectivos.

FUNCIONES

En particular ya sigún la lei 9/2001 promulgada na fecha de la creación d’esta entidá, correspónden-ys a Bombeiros d’Asturias las funciones siguientes:

• La extinción d’incendios.
• El salvamentu de personas ya bienes en casu de siniestru ou situación d’emerxencia.
• La intervención en cualisquier clas de salvamentu ou rescate a requerimientu de l’autoridá competente.
• La intervención n’operaciones de protección civil d’alcuerdu cono dispuesto na lexislación en vigor ya, en particular, nos planes territoriales ya d’aplicación.
• Nos supuestos d’intervención, la recuperación de las víctimas; la prestación a los afectaos de los primeiros auxilios ya de las atenciones médicas d’urxencia; no sou casu, la coordinación ya tresláu urxente a los centros correspondientes, ya hasta la realización del tresláu cuando sea necesariu.
• L’adopción de mididas de seguridá excepcionales ya provisionales, a la espera de la decisión de l’autoridá competente, sobre’l cierre ya salida de xente de locales ya establecimientos públicos, ya la evacuación de inmuebles ya propiedades, en situaciones d’emerxencia ya mientras las circunstancias del casu lo fagan imprescindible.
• La limitación ou restricción, durante’l tiempu necesariu, de la circulación ya permanencia en vías ya l.lugares públicos en supuestos d’incendiu, catástrofe ou calamidá, en tanto recái la decisión de l’autoridá competente.
• La investigación ya informe sobre los siniestros en qu’intervenga por razón de la súa competencia, asina cumo en casu de requerimientu de l’autoridá competente.
• La obtención de la información necesaria de las personas ya entidades relacionadas conas situaciones ya l.lugares onde se produza la situación d’emerxencia pa la correcta resolución de talas situaciones.
• La coordinación de la organización de los servicios d’extinción d’incendios ya de salvamentos existentes nel territoriu de la Comunidá Autónoma, tanto los públicos, cualquiera que sea l’alministración a la que pertenezan, cumo los privaos, pa garantizar la prestación eficaz ya integral del serviciu na totalidá del territoriu de la Comunidá Autónoma.
• La dirección ya coordinación del personal voluntariu ya de los servicios de vixilancia, seguridá ya prevención contra incendios ya autoprotección d’empresas públicas ou privadas, nel ámbitu de las funciones atribuidas a Bombeiros del Principáu d’Asturias.
• La vixilancia de la instalación, organización ya mantenimientu de los servicios d’extinción d’incendios ya salvamentu de titularidá del conceyu.
• La realización de campañas d’información ya formación de los ciudadanos en materia de prevención ya actuación énte siniestros.
• La investigación de técnicas, instalaciones ya sistemas de protección contra incendios.
• L’actuación en servicios d’interés públicu por razón de la específica capacidá de los sous miembros ya
• l’ adecuación de los medios materiales de que dispón, amás de cualisquier outras funciones dirixidas a la protección de personas ou bienes, siempre que sean necesarias ya proporcionadas a los feitos.
• Cualesquier outras funciones que-y atribuya la lexislación vixente ou que-y delegue ou encomiende’l titular de la Conseyería a la que Bombeiros del Principáu d’Asturias ta adscrita.