L’Agrupación de Voluntarios de Protección Civil del Conceyu de Cangas del Narcea "Médicu Ramón Crespo" nacíu hai un añu cuando un grupu de personas decidienon xuntase pa prestar de forma voluntaria, altruista ya solidaria colaboración ya apoyu al restu de profesionales de la seguridá.
El voluntariáu de protección civil nin sustitúi nin reemplaza a los servicios d’intervención, senón que colabora, complementa ya apoya las actuaciones de los segundos solicitándolo anantes la ciudadanía ou las alministraciones interesadas.
Las funciones de la nuesa agrupación van orientadas, principalmente, a la prevención de riesgos ya situaciones d’emerxencia que pueden afectar al conceyu, tamién al control de las situaciones citadas con carácter previu a l’actuación de los servicios competentes ou en colaboración con el.los.
El sou nome peculiar, "Médicu Ramón Crespo", yá un homenaxe pequenu qu’esti conceyu quixo faer a tal profesional de la sanidá, que durante muitos años prestóu servicios en Cangas del Narcea, pola súa gran calidá humana ya pola solidaridá a la hora d’exercer tala profesión, particularmente conos vecinos que residían nas zonas rurales, a los que-ys era difícil aveirase pola vil.la nin tan siquiera pa ir al médicu.
Dende la súa constitución esti grupu de personas vieno trabayando incansablemente pa que, pesie a los medios ruinos de los que tovía se dispón, l’agrupación creciera día a día ya meyorara la prestación de servicios a la ciudadanía.
Na actualidá l.levamos feitos servicios múltiples, tanto dientro cumo fuera del nuesu conceyu ya, por eso dende aiquí, la Casa Conceyu de Cangas del Narcea quier agradecer al nuesu voluntariáu la súa entrega altruista, entusiasta ya desinteresada ya’l l.labor que con tantu esfuerzu vien desenvolviendo, amás d’animalos a siguir trabayando incansablemente na agrupación.
Amás queremos animar a las personas que deseen incorporase a la nuesa agrupación a faelo, porque participando voluntariamente n’acciones de protección civil, mediante’l vuesu compromisu’i colaboración no marcu de las instituciones sociales, vais contribuir al engrandecimientu d’esti conceyu ya a la realización del primer drechu que garantiza la nuesa constitución no sou artículu quince “el drechu a la vida”.

ORGANIGRAMA

La nuesa agrupación estructúrase orgánica ya funcionalmente cumo se describe embaxo:
SR. ALCALDE-PRESIDENTE DE LA CORPORACIÓN DEL CONCEYU DE CANGAS DEL NARCEA: Don José Luis Fontaniella Fernández
COORDINADORA DE L’AGRUPACIÓN DE VOLUNTARIÁU DE PROTECCIÓN CIVIL DEL CONCEYU CANGAS: Doña Ana Belén Fuertes Marqués
XEFE D’AGRUPACIÓN: Don César Rodríguez García
MIEMBROS OPERATIVOS DE L’AGRUPACIÓN DE VOLUNTARIÁU DE PROTECCIÓN CIVIL DEL CONCEYU CANGAS

NORMATIVA LEGAL

Las agrupaciones de protección civil de los conceyos tán reguladas xurídicamente por una serie de normas, ente las que destacan:
• La Constitución Española de 1978.
• Lei 2/1985 de 21 de xineiru sobre protección civil.
• Lei 7/1985 de 2 d’abril reguladora de las bases de réxime de los conceyos.
• Rial decretu 407/1992 de 24 d’abril pol que s’aprueba la norma básica de protección civil.
• Lei 6/1996 de 15 de xineiru del voluntariáu.
• Plan territorial de protección civil del Principáu d’Asturias (PLATERPA), homologáu pola Comisión Nacional de Protección Civil el 20 d’outubre del 2000, (p’Asturias).
• Reglamentu de l’Agrupación de voluntariáu de Protección Civil de Cangas del Narcea, (BOPA 185 de 8 d’agostu de 2008), (aplicable pa la nuesa agrupación).