Coincidiendo cono Día Internacional de la Muyer Rural, el 15 d’outubre, la Conceyalía de la Muyer del Conceyu de Cangas del Narcea, al traviés de l’Axencia d’Igualdá, organizóu’l piel.le de la sesta edición de los talleres “Muyer Rural 2012”.

L’alcalde de Cangas del Narcea, José Luis Fontaniella, destacóu énte las asistentes al alcuentru la importancia que tienen los talleres del programa “Muyer Rural”: “permiten crear un puntu d’alcuentru ente muyeres de l.lugares diferentes pa compartir conxuntamente’l desenvolvimientu d’una actividá d’ociu a la vez que cultural, cono obxectivu de que, cumo grandes tresmisoras de cultura, las muyeres formen parte d’un cambiu social que favoreza la igualdá d’oportunidades ente homes ya muyeres”.

El principal actu de la xornada foi la conferencia “El papel de las muyeres na conservación del patrimoniu ya l’arquitectura tradicional rural”, del arquitectu del Grupu de Desenvolvimientu Rural Altu Narcea Muniel.los, Jesús Marcos Fernández.

Espuéis de la conferencia, las más de 150 muyeres que se dienon cita nesta celebración, ente el.las participantes de los talleres ya componentes de las asociaciones diferentes de muyeres del conceyu, disfrutanon d’una xanta d’harmanamientu ya bail.le cono obxectivu de fomentar la participación social de las muyeres.

Esta edición sesta de las xornadas itinerantes pa muyeres del mediu rural “Muyer Rural 2012” desenvolvíuse durante las dúas primeras sumanas d’outubre, nas escuelas rurales ou l.lares sociales de Robléu Teinás, Porl.léi, Tresmonte, Santiáu de Sierra, Cibuyu, Carbachu ya Vil.laxer. Cadaguna d’estas siete zonas cuntóu con ocho horas de conferencias nas que se tratanon temas centraos na muyer, igualdá d’oportunidades ya violencia de xéneru.
 

Imágenes