El reglamentu del Conseyu de la Muyer del Conceyu foi aprobáu pol Plenu de la Casa Conceyu na súa sesión de fecha 30 d’outubre del 2008. Espuéis d’aprobáu, foi publicáu no Boletín Oficial del Principáu d’Asturias del 16 de febreiru del 2009.

Trátase de crear un órganu consultivu que sea quien a incentivar la participación de la población femenina no referente a las políticas de xéneru no nuesu conceyu. Nél tán representadas las asociaciones de muyeres del conceyu que lo solicitanon, los partíos políticos con representación del conceyu ya las secretarías ou departamentos de la muyer de los sindicatos con presencia no conceyu. Yá un foru de debate ya propuesta d’actuaciones que se xunta dúas veces al añu, cono obxectivu principal de promocionar ya meyorar la participación ya coordinación de las muyeres na vida del conceyu, pa intentar que las políticas que se diseñen dende un enfoque integráu de xéneru consigan un desenvolvimientu igualitariu no nuesu conceyu.

Textu de la publicación no BOPA (pdf, 142 Kb)

FUNDAMENTACIÓN

El principiu d’igualdá ta recoyíu na Constitución Española cumo drechu fundamental, lo que l.lieva consigo una equiparación formal de drechos ente l’home ya la muyer (artículu 14: “los españoles son iguales énte la lei, sin que pueda prevalecer discriminación dalguna por razón de nacencia, raza, sexu, relixón ou cualisquier outra condición personal ou social”). Amás, el textu constitucional recói la obligación de los poderes públicos de facilitar la participación de toda la ciudadanía na vida política, económica, social ya cultural (artículu 9.2).

L’Estatutu d’Autonomía del Principáu d’Asturias expresa no sou artículu 9 la obligación de los poderes públicos de procurar l’adopción de mididas dirixidas a promover las condiciones ya a remover las torgas posibles pa que la l.libertá ya la igualdá del individuu ya de los grupos nos que s’integra sea efectiva ya rial, al tiempu que facilite la participación de toda la ciudadanía na vida política, económica, cultural ya social d’Asturias.

Con todo, pesie a esta “igualdá formal” otorgada pol nuesu ordenamientu xurídicu, la desigualdá d’oportunidades de las muyeres na nuesa sociedá yá un feitu (ámbitu laboral, educativu, de participación política, corresponsabilidá nel hogar, etc.), lo que pon de manifiestu la distancia ente la rialidá ya’l drechu, yá dicir, que nun se consiguíu la “igualdá rial”.

La participación de las muyeres nel ámbitu públicu ya de toma de decisiones sigue siendo un retu ya, por eso, faise necesaria la existencia de políticas específicas pa eliminar las desigualdades ya consiguir una sociedá más xusta con igualdá d’oportunidades pa los dous xéneros. Polo tanto, el Conseyu de la Muyer del Conceyu tien de convertise nuna ferramienta de gran importancia a la hora de que las muyeres ya’l sou movimientu asociativu puedan aportar la súa propia experiencia, capacidá ya perspectiva a las políticas d’igualdá d’oportunidades del conceyu. El Conseyu vei ser l’órganu qu’articule la participación ya vei rixise pol reglamentu que s’expón embaxo.

CAPÍTULU I- DEFINICIÓN, NATURALEZA XURÍDICA YA FINALIDÁ

ARTÍCULU 1.-

El Conseyu de la Muyer del Conceyu tien la naturaleza xurídica d’un órganu consultivu que pretende incentivar la participación de la población femenina no referente a las políticas de xéneru na alministración del conceyu.

La súa finalidá yá colaborar cono Aria de la Muyer de la Casa Conceyu pa executar las políticas citadas na rialidá del conceyu de Cangas del Narcea ya ayudar na adopción de las mididas que puedan valir pal sou desenvolvimientu ya promoción.

Las súas funciones van ser única ya exclusivamente d’informe, consulta ou propuesta en relación a la política del conceyu en materia d’igualdá d’oportunidades ente homes ya muyeres.

D’esta manera, el Conseyu tien de constituise foru de debate, discusión ya alcuentru de las asociaciones de muyeres del conceyu ya potenciar que las súas aportaciones se tresmitan ya repercutan sobre’l conxuntu de la sociedá canguesa.

CAPÍTULU II - FUNCIONES

ARTÍCULU 2.-

El Conseyu de la Muyer nel Conceyu vei tener las funciones siguientes:

• Elaboración de propuestas d’acciones a faer, siguimientu ya evaluación de los planes d’igualdá del Conceyu de Cangas del Narcea.
• Siguimientu de las políticas d’igualdá del Conceyu de Cangas del Narcea.
• Asesoramientu en proxectos de colaboración con outras instituciones públicas ya privadas en temas relacionaos cona muyer.
• Propuesta ya canalización de la participación de las muyeres dientro del conceyu, amás de mediante las asociaciones existentes no mesmu.
• Apurrimientu’i propuestas d’actuaciones en materia d’igualdá d’oportunidades a la Corporación del Conceyu.
• Propuesta’i mididas, suxerencias ou queixas pa ser discutidas nos órganos correspondientes del Conceyu.
• Recoimientu ya discusión no sou senu de las propuestas ou suxerencias en materia d’igualdá que se dirixan a personas ou colectivos non pertenecientes al Conseyu, canalizándolas hacia outros órganos competentes de la Casa Conceyu se s’estima oportuno.
• Formulación d’un informe añal sobre las actividades feitas no Conseyu.

CAPÍTULU III - COMPOSICIÓN YA FUNCIONAMIENTU

ARTÍCULU 3.-

El Conseyu de la Muyer del Conceyu vei tar integráu por:

• Persona qu’ostente la Conceyalía de la Muyer del Conceyu de Cangas del Narcea.
• Una representante de cada asociación de muyeres inscrita no Rexistru d’Asociaciones del Conceyu.
• Una representante de cada grupu políticu perteneciente a la Comisión Informativa de la Muyer.
• Una representante por cada aria, departamentu ou secretaría de la muyer de los sindicatos con presencia na zona.
• Personal del Aria de la Muyer de la Casa Conceyu.

Cada asociación ou grupu vei designar a las súas representantes propias ya, no sou casu, a las suplentes de las mesmas se lo considera oportuno.

El Conseyu de la Muyer vei tar formáu por muyeres, nun siendo qu’exista imposibilidá manifiesta.

ARTÍCULU 4.-

Los órganos de funcionamientu del Conseyu de la Muyer del Conceyu van ser los siguientes:

1. Presidencia. Por delegación de quien ostente l’Alcaldía, vei ser la persona titular de la Conceyalía de la Muyer la que presida’l Conseyu de la Muyer del Conceyu; en casu d’asistencia del Alcalde/esa vei ser él/el.la la qu’exerza’l cargu.
2. Secretaría. Vei ser designada pola Presidencia del Conseyu d’ente’l personal de la Casa Conceyu, vei actuar con voz pero ensin votu, cumo secretaria/u del Conseyu. En casu de recaer esti cargu en dalguna de las personas qu’actúan cumo vocales van actuar con voz ya votu.
3. Plenu del Conseyu. El Conseyu de la Muyer del Conceyu vei funcionar en Plenu. Cumo tal, vei tar compuestu pola totalidá de los sous miembros: amás de quien ostenten la presidencia ya la secretaría, el Plenu vei tar compuestu polos ya polas vocales:
   1. Un/a representante por cadagunu de los grupos políticos pertenecientes a la Comisión Informativa de la Muyer.
   2. Una representante de cadaguna de las asociaciones de muyeres existentes no conceyu.
   3. Una representante del aria, departamentu ou secretaría de la muyer de los sindicatos con presencia na zona.
   4. Axente d’Igualdá d’Oportunidades.
   5. Asesora de la Muyer.

El Plenu del Conseyu puede aceptar cumo miembru a cualquier persona que por mayoría se considere d’interés integrar.

ARTÍCULU 5.-

Correspuenden a la Presidencia del Conseyu las funciones siguientes:

• Representación legal del Conseyu énte toda clas d’autoridades ya organismos.
• Convocar, presidir, suspender ya l.levantar las reguniones del Conseyu.
• Apurrir a la Casa Conceyu los alcuerdos ya propuestas qu’adopte’l Conseyu.

ARTÍCULU 6.-

Correspuende a la secretaría del Conseyu l.levantar acta de las reguniones que se celebren. Compéte-y amás la xestión alministrativa del Conseyu de la Muyer del Conceyu ya l’asistencia al mesmu.

ARTÍCULU 7.-

Correspuende a los/as vocales la propuesta al Conseyu de tódalas iniciativas que surdan, tanto a nivel individual, cumo al traviés de las entidades a las que representan ya qu’afecten a las muyeres.

ARTÍCULU 8.-

Correspuenden al Plenu del Conseyu las funciones siguientes:

• Siñalar las linias xenerales de trabayu del Conseyu de la Muyer del Conceyu.
• Crear comisiones ou grupos de trabayu.
• Aprobar l’almisión d’entidades nuevas ou d’asociaciones no Conseyu.
• Aprobar l’acta de sesiones anteriores.
• Faer propuestas de modificación del reglamentu presente por mayoría absoluta de los sous miembros.
• Cualisquier outras que, correspondiendo al Conseyu, nun tean expresamente atribuidas a outros órganos.

ARTÍCULU 9.-

El Plenu del Conseyu vei poder constituir, no sou senu, comisiones ou grupos de trabayu en relación a temas nos que se considere necesario afondar, con carácter previu a l’adopción de decisiones pol Plenu. Estos grupos van poder saparcer no momentu nel qu’alcancen l’obxectivu ou cumplan la función pa la que foran creaos.

ARTÍCULU 10.-

El Plenu del Conseyu vei poder solicitar, de manera extraordinaria, la presencia de personas, entidades ou colectivos ayenos al Conseyu ya con una aportación que pueda ser necesaria ou conveniente nun momentu ou cuestión determinada. Nesti casu, estas personas van acudir en calidá d’asesoras nesta materia, con voz pero sin votu.

ARTÍCULU 11.-

Las reguniones del Conseyu van ser cumo mínimo una cada semestre, con carácter ordinariu, preferentemente nos meses de xunu ya’l mes muertu, pudiendo regunise con carácter extraordinariu cuando asina lo considere la súa presidencia ou lo solicite polo menos un terciu de los sous miembros.

La convocatoria vei faese por escrito con una antelación mínima de 3 días, na convocatoria vei faese constar l’orde del día.

ARTÍCULU 12.-

Los alcuerdos del Plenu del Conseyu van adoptase por mayoría de los sous miembros presentes.

ARTÍCULU 13.-

El Conseyu nun vei tener presupuestu propiu. Las personas qu’intengran el Plenu del Conseyu de la Muyer nun van recibir por tanto remuneración pola realización de las súas funciones dientro del Conseyu.

CAPÍTULU IV - NOMAMIENTU DEL CONSEYU

ARTÍCULU 14.-

El nomamientu de los/las vocales miembros del Conseyu correspuende al Plenu de la Corporación del Conceyu, a propuesta de las asociaciones ou grupos respectivos. Vei ratificala’l Conseyu ya renovase necesariamente con cada corporación.

ARTÍCULU 15.-

El nomamientu de los miembros del Conseyu que representen a grupos políticos vei ser, cumo máximo, por cuatro años, expirando en todu casu cono mandato de la corporación que los designóu, siendo posible la súa renovación. Pa los miembros restantes del Conseyu, la renovación nun vei ser obligatoria nos cambios de la corporación, siendo las propias entidades representadas quien alcuerden la continuidá cumo vocales del Conseyu.

ARTÍCULU 16.-

Los miembros del Conseyu van cesar polas causas siguientes:

1. Renuncia expresa.
2. Expiración del plazu del sou mandatu, sin perxuiciu de continuar l’exerciciu de las súas funciones hasta la toma de posesión de las súas sucesores/as.
3. En casu del personal de la Casa Conceyu, por acabar la súa relación laboral.
4. Declaración d’incapacidá ou inhabilitación pal desempeñu de cargu públicu ou sentencia xudicial firme.
5. Por cese alcordáu pol Plenu del Conseyu a propuesta de la mesma organización que propuxo al miembru cesante.
6. Por disolución de l’asociación de muyeres en representación de la que formaba parte cumo vocal del Conseyu.
7. Por causar baxa de l’asociación de muyeres en representación de la que formaba parte del Conseyu.