Durante l'alcuentru de socias d'esti programa, promovíu dende l'Institutu de la Muyer cono obxectu de dotar a las muyeres d'espacios d'intercambiu ya formación propios, homenaxeóuse a 13 muyeres, una por vocalía, no casu de Cangas foi a María Dolores Coque Rodríguez, de 89 años.

    María Dolores Coque Rodríguez nacíu en Berguñu'l 5 d'outubre de 1926, nuna familia numarosa. Debío al excesu de trabayu en súa casa, cuasi nun podíu ir a la escuela, yá que tenía qu'ayudar nos trabayos duros de tolos días a la súa familia dende bien pequena.
    Con 34 años quedóu viuda, con 5 fíos al cargu ya embaranzada de 6 meses. Nunca se volvíu a casar nin a empareyar. Crióu a las súas dúas fías ya a los sous cuatro fíos cona ayuda de la súa familia política, cona que convivíu dende que se casóu.
    No 2007, na primer edición de "Tiempu propiu" en Cangas, entróu no programa. Esta actividá supuxo muito pa el.la, foi una segunda oportunidá pa volver a la escuela con compañeras conas que compartir experiencias. Las súas amigas nun tienen más que palabras bonas pa el.la, califícanla de bona, cariñosa, al.legre... Lo que ta claro yá que yía una persona entusiasta ya participativa, lo que la fai una bona merecedora d'esti reconocimientu.
    Na celebración del eventu tuvienon presentes acompañando a María, las súas fías ya los sous xenros,  32 socias, la conceyala de la Muyer, Carmen López ya l'axente d'Igualdá.

    Outramiente, enl.lazando con esti homenaxe, queremos recordar que la conceyalía de la Muyer del Conceyu Cangas financia'l programa de "Tiempu propiu", que pon talleres durante tol añu, de feitu, no primer trimestre del añu féixose'l de "Avieyamientu activu", onde participanon 45 muyeres; mientras que nesti segundu trimestre, los responsables del CDTL impartienon el cursu de "Internet",  con 41 alumnas; ya, dende xineiru hasta xunu, fairáse'l de "Movimientu saludable", con 64 participantes.
    A todos estos talleres, hai qu'axuntar unu del Institutu Asturianu de la Muyer sobre "Salú ya bienestar", con 32 muyeres apuntadas; ya la salida cultural añal de las participantes nel programa a Veiga ya L.luarca'l 25 de mayu.

    Se dalguna muyer ta interesada en matriculase nun tien más que pasar pola Axencia d'Igualdá, organismu dende'l que se coordina esti programa. Las matrículas ábrense no mes de setiembre ya tienen la duración d'un cursu escolar.

Imágenes