Por sétimo añu consecutivu, eichánonse a andar los talleres dirixíos a muyeres dientro de las xornadas itinerantes no mediu rural “MUYER RURAL 2013”, nel.los van participar en todu'l mes d'outubre 180 muyeres repartidas ente ocho núcleos de población del conceyu, que son: Robléu de Teinás, Bornazal, Cibea, Bisuyu, Cibuyu, Santiáu de Sierra, Carbachu ya Tresmonte.

Los talleres organízanse dende la Conceyalía de la Muyer del Ilmu. Conceyu de Cangas del Narcea, al traviés de l'Axencia d'Igualdá.

Profesionales de campos distintos (psicoloxía, fisioterapia, pedagoxía), qu'amás son expertas en xéneru, van ser un añu más las encargadas de poner los talleres xunto cono personal del Aria de la Muyer del Conceyu, l'Axente d'Igualdá ya'l personal del Centru d'Empresas ya del Serviciu de Normalización L.lingüística.

L'obxectivu del programa yá'l fomentu de la participación social de las muyeres del mediu rural, propiciando l'alcuentru ya la relación ente las destinatarias, fomentando las redes sociales de muyeres de la mesma zona, amás d'incentivar la evolución de mentalidades ya cambiu d'actitudes que faciliten la participación de las muyeres en tódolos ámbitos de la vida pública ya privada sin prexuicios sexistas.

Dende la Conceyalía de la Muyer tamién vei ponese en marcha'l programa Tiempu propiu, pa muyeres mayores de 50 años. Estiañu esti programa vei ser financiáu íntegramente pol Ilmu. Conceyu de Cangas del Narcea. No mes de los santos van emprincipiar los talleres que van faese durante'l cursu.

Esti programa coordínase dende l'Axencia d'Igualdá. Preténdese con él siguir cona linia d'actuación que se venía siguiendo dende qu'escomencipiara'l programa no 2007 nesti conceyu. Van faese talleres pa las muyeres, visitas culturales ya piel.le del programa coincidiendo cono fin del cursu escolar.

Imágenes