L’autora del l.libru Nosotras, en femenino y singular, Vanesa Allonca Magadán, presenta no teatru Toreno la súa obra. Nel.la narra la historia de nueve muyeres que superanon las torgas del tiempu ya l’entornu ya cheganon a convertise en referentes femeninos de la zona rural del occidente asturianu. Con esti l.libru, Vanesa Allonca quixo reconocer el trabayu ya las contribuciones a la sociedá de muyeres que fono cuasi invisibles hasta agora: “quiero dar un homenaxe merecíu a las muyeres que quedanon esqueicidas ya escondidas debaxo’l velu del tiempu”, asegura l’autora.

Maestras, una escritora, una filóloga, una pastora ou una chalanera son dalgunas de las protagonistas del l.libru Nosotras, en femenino y singular. Las súas traxectorias profesionales ya personales plásmanse nas fueyas d’esti trabayu, del que se desgranarán dalgunos detalles el vienres 9 a las 17:30 na Casa la Cultura, al mesmu tiempu redundaráse na importancia de la reconocencia del l.labor de las muyeres a lo l.largo la historia gracias a la presencia de l’autora: Vanesa Allonca Magadán.

Amás d’esta presentación, a la que pueden asistir tódolos interesaos; la Conceyalía de la Muyer, al traviés de l’Axencia d’Igualdá del Conceyu Cangas, ta desenvolviendo outru tipu d’actividades dirixidas a las muyeres ya a los centros educativos. Con motivu del Día Internacional de las Muyeres, vei faese una regunión semestral del Conseyu de la Muyer del Conceyu na que participarán representantes de las asociaciones de muyeres del Conceyu, representantes de tódolos grupos políticos, de los sindicatos ya trabayadores de la Conceyalía de la Muyer.

Impartiráse proximamente tamién el taller “escoyer una profesión n’igualdá” no colexu Alejandro Casona, se bien na actualidá ya tán fadiéndose talleres d’igualdá nas escuelas de La Riela, Cibuyu ya Castanéu.