Alredor de 200 personas celebranon el Día Internacional de las Muyeres asistiendo a los actos organizaos pol Conceyu de Cangas del Narcea. La xornada empicipióu n’El Mercáu, puntu de partida de la marcha rosa que discurríu pol Paséu del vinu hasta L.lumés.

Esta iniciativa innovadora en Cangas del Narcea enmárcase dientro del Plan d’Igualdá del Conceyu, nel aria de “Muyer, salú ya deporte”, ya con el.la pretendíuse dar visibilidá ya concienciar a la sociedá escontra’l cáncer de mama.

L’alpinista canguesa Rosa Fernández Rubio, xunto a la Conceyala de Muyer ya Igualdá, Marta Fernández, foi la encargada d’encabezar la marcha. A la súa chegada a L.lumés, los actos siguienon conas ponencias de Rocío Toledo, psicóloga de l’Asociación Española Contra el Cáncer en Asturias, ya de Rosa Fernández, quien narróu la súa hestoria propia de superación del cáncer de mama, na que’l deporte ya las ganas d’alcanzar los sous suenos ya metas influyenon na súa recuperación.

Belén Fernández, Axente d’Igualdá del Conceyu de Cangas del Narcea, subrayóu l’éxitu de la marcha ya especialmente l’interés que suscitóu la conferencia de Rosa Fernández “una hestoria de superación ya éxitu al traviés del deporte”.

Pal Alcalde José Luis Fontaniella la xornada valíu amás pa conmemorar el Día Internacional de las Muyeres, pa chamar l’atención sobre’l cáncer ya la necesidá de prevenir la enfermedá. L’Alcalde destacóu cumo la conferencia de Rosa Fernández podía ser un exemplu pa muitas personas: “Rosa mostróunos cumo énte cualquier enfermedá ou problema, con un gran esfuerzu ya una mentalidá fuerte ya decidida puede consiguise salir alantre”. Espuéis de la gran participación ya la bona acoyida que touvo la “I Marcha rosa. Tod@s contra’l cáncer de mama”, la Casa Conceyu apuesta por que la iniciativa se convierta nuna cita añal. “Tenemos la esperanza de que pueda siguir fadiéndose esta marcha ya enfocala cumo un proxectu a la l.larga que nun quede namás nesti añu”, apuntóu la Conceyala de Muyer ya Igualdá, Marta Fernández.
 

Imágenes