El programa Tiempu propiu, que desenvuelve l’Axencia d’Igualdá d’Oportunidades, despidíu esti cursu con una xanta na que participanon más de 100 muyeres. Ente el.las alcontrábanse las alumnas del programa ya dalgunas componentes de las asociaciones de muyeres de: La Novena de Carbachu, l’Asociación de Amas de Casa, La Puchanca de Cibuyu, Las Pilarinas de Carceda, l’Asociación de Muyeres de Bruel.les, Los Acebales de Bornazal, La Virgen de las Veigas de Bisuyu, La Veiga’l Picu de Vil.larmental, La Peña de Rodabiel de Tresmonte ya l’Asociación de muyeres con tiempu propiu d’Asturias.

Nel alcuentru, l’Alcalde, José Luis Fontaniella, ya la Conceyala de Muyer ya Igualdá, Marta Fernández, fixenon entrega de los diplomas a las 32 de las 97 alumnas que tuvienon el programa enguano ya que se gradúan espuéis de tres años de participación nos talleres diferentes propuestos en Tiempu propiu.

Amás, l’alcalde dirixíuse a las asistentes pa emplazalas a participar nas xornadas itinerantes pa muyeres del mediu rural, “Muyer rural 2012”, que la Casa Conceyu prevé recuperar n’outubre. El proxectu, que vei yá pola súa edición VI, consiste na realización de varios talleres sobre igualdá, salú ya bienestar de la muyer, que van desenvolvese polos l.lugares del conceyu.

La coordinadora de Tiempu propiu ya axente d’igualdá d’oportunidades del Conceyu, Belén Fernández, destacóu l’aceptación del programa ente las muyeres del conceyu ya lo bono que pa el.las era, “remocican”, aseguróu. Amás, Belén Fernández, esplica que’l programa enséñalas a avieyar en positivo, deprendiendo cousas nuevas ya conociendo Asturias, “dalgunas tuvienon por primer vez na playa gracias a Tiempu propiu”.

Tiempo propiu ta en marcha en Cangas del Narcea dende hai seis años, diríxese a muyeres mayores de 50 años ya consiste na realización de tres talleres añales complementaos con visitas culturales a outros conceyos asturianos, onde las participantes conocen a compañeras d’outros conceyos con quien intercambian experiencias.

Imágenes