Las sextas xornadas itinerantes pa muyeres del mediu rural "Muyer rural 2012"” empicipian en Cangas del Narcea’l l.lunes 1 d’outubre ya yá cuntan con 154 muyeres inscritas. Trátase d’un ciclu de conferencias sobre muyer, igualdá d’oportunidades ya violencia de xéneru, organizadas dende la Conceyalía de la Muyer al traviés de l’Axencia d’Igualdá d’Oportunidades del Conceyu de Cangas del Narcea.

Los talleres van ser impartíos por cuatro técnicas del Conceyu ya diríxense a tódalas muyeres de la zona sin buscar un perfil concretu. Belén Fernández, Axente d’Igualdá d’Oportunidades del Conceyu Cangas, esplica que nas ediciones anteriores: "topámonos con talleres nos que participan muyeres de 18 a más de 65 años d’edá".

Nesta edición sexta, los talleres van desenvolvese del 1 al 11 d’outubre, n’horariu de mañena ya tarde nas escuelas rurales ou locales sociales de Robléu de Teinás, Porl.léi, Tresmonte, Santiáu de Sierra, Cibuyu, Carbachu ya Vil.laxer. Cadaguna de las siete zonas vei cuntar con ocho horas de conferencias que van repartise en cuatro días, asina cada taller vei tener una duración de dúas horas.

Las temáticas concretas que van impartise nas xornadas diferentes que propón "Muyer rural" son: Reflexones sobre igualdá d’oportunidades, Violencia de xéneru ya relaciones sanas, Escritura creativa con perspectiva de xéneru, Espuéis de la violencia de xéneru: muyeres supervivientes; El flandón. La muyer cumo tresmisora de la cultura tradicional; Nuevas alternativas empresariales pa las muyeres de la zona rural ya, p’acabar, Roles ya medios de comunicación.

Pa poner el broche final a las xornadas, vei celebrase un actu de piel.le’l 15 d’outubre, coincidiendo cono Día Internacional de la Muyer Rural. Ta previstu que l’actu empicipie a las 12:30 con una conferencia que vei correr a cargu del arquitectu del Grupu de Desenvolvimientu Rural Altu Narcea-Muniel.los, Jesús Marcos Fernández ya que vei tratar sobre "El papel de las muyeres na conservación del patrimoniu ya l’arquitectura tradicional rural". Espuéis de la conferencia, vei faese una xanta a la que van asistir las participantes de los talleres ya ser convidadas las asociaciones de muyeres del conceyu.

El programa "Muyer rural 2012" tien l’obxectivu de fomentar la participación social de las muyeres. Amás, Belén Fernández considera qu’yá una forma de "sensibilizar a la población en materia d’igualdá d’oportunidades ya violencia de xéneru, amás de dar a conocer el papel de las muyeres rurales na cultura ya na sociedá ya favorecer alternativas empresariales a dichu colectivu".

Trípticu de las xornadas