El Conceyu de Cangas del Narcea, dende la Conceyalía de Muyer ya Igualdá ya al traviés de l’Axencia d’Igualdá, organiza la primer Marcha rosa con motivu de la celebración del Día Internacional de las Muyeres, 8 de marzu.

Esta iniciativa innovadora en Cangas del Narcea, que pretende concienciar a la sociedá sobre’l cáncer de mama, enmárcase dientro del Plan d’Igualdá del Conceyu, nel aria de “Muyer, salú ya deporte” ya cunta cona colaboración de l’Asociación Española contra el Cáncer.

La primer Marcha rosa de Cangas del Narcea vei empicipiase n’El Mercáu, a las 10:30 del 8 de marzu, ya vei discurrir pol Paséu del Vinu hasta L.lumés. Una vez en L.lumés, los asistentes a la marcha van dase cita no restorán La Casilla ande van presenciar las conferencias “Una historia de superación y éxito a través del deporte”, a cargu de la montañera d’élite de Cangas, Rosa Fernández Rubio, ya “Factores de riesgo del cáncer en las mujeres y prevención”, de mano de la psicóloga de l’Asociación Contra el Cáncer de Asturias, Rocío Toledo. Nel actu van tar presentes ya intervenir l’Alcalde de Cangas del Narcea, José Luis Fontaniella, ya la Conceyala de Muyer ya Igualdá, Marta Fernández.

La Marcha rosa ta abierta a la participación de toda la población interesada ya sensibilizada cono tema. Amás, dende la organización convídase a tódalas personas a acudir vistiendo una prenda de color de rosa, símbolu distintivu de la l.luita escontra’l cáncer de mama. N’acabando los actos programaos, la Casa Conceyu vei fletar autobuses de baldre pa volver al centru de Cangas.

Amás, dientro de las actividades organizadas pa conmemorar el Día Internacional de las Muyeres, dende l’Axencia d’Igualdá tán desenvolviéndose talleres sobre “Educación n’igualdá”. Los talleres tán siendo impartíos pola técnica d’igualdá, Belén Fernández, en diferentes centros educativos del conceyu, nas asociaciones de madres ya padres (AMPAS) ya en varias asociaciones de muyeres.

Los talleres impártense durante los meses de febreiru, marzu ya abril.
 

Imágenes